http://hk.apple.nextmedia.com/ne ... E4%B8%AD-%E5%B9%9F-
從未見過一個人創業，會如此瞓身，背後又肩負這麼多掙扎及感情。板間房出身，在深水埗賣龍躉十多年，現已有「龍躉王」稱號的吳伯恩，早已賣到上晒岸，但兩個月前他沽清手頭物業及股票，傾盡積蓄以二千六百多萬元購入太子兩個鋪位，開辦「鉅龍酒家」。即使他自覺多年來只顧生意愧對家人，多次說至眼濕濕，也要盡地一煲。其瞓身程度有別一般創業者，為的，是心中一條「幟」。
原來○三年他曾跟黃永幟（幟哥）夾股開龍皇酒家，但雙方意見不合，最後吳伯恩退股憤然離開，然而幟哥此後卻爆紅起來。不忿、寃屈，使吳伯恩八年來一直念念不忘再搞酒樓。這次他自言：「今次去到盡，底衫都無得著啦。」
[黃永幟（幟哥）與恩記曾是好兄弟，更夾份大搞龍皇，唯最後因賬目問題而拆夥。說到此，幟哥做出不少托眼鏡、摸鼻、抹面等小動作。] 黃永幟（幟哥）與恩記曾是好兄弟，更夾份大搞龍皇，唯最後因賬目問題而拆夥。說到此，幟哥做出不少托眼鏡、摸鼻、抹面等小動作。
鉅龍酒家前週六開張，老闆吳伯恩（恩記）跟妻子謝細妹，開業前一晚輾轉反側，徹夜難眠。第二天來到酒樓即忙於招呼到場祝賀的親友，猛多謝同行支持，又不時用洗潔精抹抹放滿龍躉作生招牌吸客的魚缸，他輕嘆說：「裝修佬已提醒我，俾多三萬蚊抽真空就唔會好似而家咁，矇查查有霞氣，但我瞓身已搞到無晒錢，唯有慳得一蚊得一蚊啦！」
吳伯恩兩公婆十多年來日做夜做，已把在深水埗的魚檔「恩記龍躉大王」辦得很成功，成為全港最大的龍躉批發商，收入穩定，住深井複式大屋，有寶馬汽車代步，又足以把三個仔女養大。本可輕鬆等退休，但吳伯恩此時卻選擇押上家產來賭一鋪「大」！兩個月前，他把所有投資物業及股票沽清，斥資二千六百五十萬元在太子購入兩個連閣樓共三千呎的鋪位，並與另外五名股東夾股三百萬元在該鋪搞「鉅龍酒家」。
[鉅龍酒家三千呎鋪由兩個中型鋪位合併而成，酒家原先只做晚市至消夜時段，唯在試業一星期後，發現客量比預期少，本週一已即時增加午市及取消消夜時段。] 鉅龍酒家三千呎鋪由兩個中型鋪位合併而成，酒家原先只做晚市至消夜時段，唯在試業一星期後，發現客量比預期少，本週一已即時增加午市及取消消夜時段。
提起「幟」有條刺
有來幫襯的客人不經意說：「鉅龍無論名字跟標誌，都跟龍皇酒家相似。」一聽見「龍皇」兩字，像觸動了吳伯恩的死穴，他拍了拍餐枱，輕閉雙唇說：「我唔會去抄襲，鉅龍意思是金色巨大的龍，自然就配龍的標誌。而且龍皇呢個名，本身正出自我手筆！」
難怪吳伯恩如此肉緊，龍皇正是他八年來念念不忘的心結。原來他跟現時龍皇酒家老闆黃永幟（幟哥）是有十幾年感情的老死，○三年，他與當時還是籍籍無名的幟哥，跟另一小股東夾股開設龍皇酒家，並以「下餐免費請你食龍躉」做綽頭，更日日親自劏龍躉來吸客，而面對傳媒做訪問亦由他出面，並由幟哥負責財務會計。
然而開業一年多，吳伯恩眼見酒家日日排長龍又坐滿食客，但每次埋數都是紅字蝕本，計過數後認為無可能唔賺錢，於是質問幟哥。他說唯有怪自己：「以為做好樓面，就唔使理其他，原來唔睇盤數就出事。」事後他跟幟哥「講數」，「一係佢走，一係我走。我總共投資咗一百萬，但一個仙都冇拎番就離場啦。」兩兄弟從此無偈傾。
[恩記開張時祈求生意興隆，眾拍檔和氣生財。店鋪雖鄰近太子港鐵站，但面對大馬路，客人在哪裡泊車是難題。他計劃與附近洗車屋合作，並拍心口自信表示：「生人做生鋪，死鋪做生佢，一定無問題！」] 恩記開張時祈求生意興隆，眾拍檔和氣生財。店鋪雖鄰近太子港鐵站，但面對大馬路，客人在哪裡泊車是難題。他計劃與附近洗車屋合作，並拍心口自信表示：「生人做生鋪，死鋪做生佢，一定無問題！」
「走在同一條跑道」
記者上週五相約幟哥「話當年」，幟哥想也不想便指着心口說：「○三年，我自己一個人搞龍皇，撐到今時今日，從來都無同人夾股合作，所以好辛苦。」但記者問到吳伯恩是否有股份時，他停頓數十秒後，吞吞吐吐表示：「係！當年係佢搞先，之後唔知點解唔做，叫我幫手搵人，搵咗好耐都冇人肯頂，咁我話不如俾我試吓啦，就開始接手龍皇。」但整個訪問他都摸鼻、掩口、兩頭望，顯得極不自然。
吳伯恩跟黃永幟各執一詞，就像一場羅生門。有認識兩人的酒樓老行尊表示：「全行都知佢哋兩個夾份開龍皇，恩記輸蝕在唔熟行情，被人搵笨。自此，你睇到佢心中有條刺，多年來四出索料，等機會搞番飲食。」
[八年前龍皇酒家開張後，恩記（右二）親力親為大搞綽頭，經常放生大龍躉提升酒家知名度。] 八年前龍皇酒家開張後，恩記（右二）親力親為大搞綽頭，經常放生大龍躉提升酒家知名度。
而龍皇在幟哥全盤接手後，因多次主持電視飲食節目，個人和酒家均一炮而紅，知名度急升，分店數目亦越開越多，吳伯恩坦言經常有人在他面前講起幟哥，說：「喂！你老友最近好紅喎。」吳伯恩都會立刻回應一句：「咁咪好囉。」事實上，他內心正在翻騰，多次不經意提到龍皇。談及鉅龍為何購入自用鋪，他即說龍皇灣仔鋪位因加租而結業。問及鉅龍為何不做宣傳，他即說是因為眼見龍皇大搞宣傳，會無心做好食品，影響生意額，寧把心機投放在食客身上。他又強調：「唔好以為幟哥已經跑到終點，我先剛起步，絕對唔係！你只可以話喺同一條跑道上面，佢暫時遠遠拋離我。」
疏忽仔女有愧
吳伯恩今次一副戰鬥格上陣，在他購入鋪位後一個月，已有炒家出價三千八百萬洽購，但他堅持不賣。在現時租金飛升的年代，經營酒家除面對加租壓力，還有員工流失、食物水準及客量等問題，有酒樓老闆表示，飲食界行家們不時有聚會交流心得，「對方不停奉承你，其實只想攞料，有時你講完邊個叻邊個係好幫手，佢轉頭就會高薪挖走，無道義講 o架！」
要全身投入這場「戰爭」，吳伯恩在酒樓開張前一天如常回家吃晚飯，但心情顯得特別複雜和矛盾。他知道酒家開張後，每晚都要親自落場招呼客人，連唯一跟家人溝通的時間也被扼殺。本來一家人早已計劃與鄰居親子樂遊韓國，唯因開鋪倉促，他和太太及十九歲兒子要幫手，最後只有兩個女兒可照計劃旅行。這餐晚飯，吳伯恩花足心機和口水逗兩個十五及十歲的女兒食魚和賴尿蝦。飯後，一家五口同坐沙發邊看電視邊食提子，晚上十時多，臨近出發，吳伯恩溫柔地對大女明莉說：「下次爹哋再陪你哋去，好唔好？鋪頭開張真係行唔開。」大女嘟起嘴「唔」一聲便去收拾行李。
板間房起家
一談仔女，吳伯恩會自感慚愧，因他早年試過在魚檔將子女放在紙皮箱方便照顧。他怪自己當初只顧生意而忽略仔女，三個仔女都不肯用心讀書。大仔明發中五畢業後就到魚檔幫手，亦曾在利苑廚房工作九個月，「如果細個同佢傾多啲，可能今時今日唔係咁。」吳伯恩眼濕濕說。
吳伯恩疼愛兒子，由他代父持有鉅龍酒家三成多股權。兒子表面在酒家當樓面，實際是學做生意兼幫阿爸睇實盤數，開張當日他穿上黃色侍應工作服，幫忙傳菜上菜，翌日已穿西裝上班，學習跟單和招呼客人，連他自己也笑說：「我支持阿爸所以來幫手，鉅龍唔錯 o架，做兩日就升職，暫時都唔覺得辛苦，真係辛苦咪唔做囉！」
至於深水埗魚檔早已上了軌道，吳伯恩靠搞綽頭和對供貨商講情義上位，單計龍躉，每日劏六至七條四十斤龍躉，如在假日例必過十條，恩記已是全港最大的海鮮批發商之一。今年四十九歲的他，回想一家五口早年居於深水埗板間房時，曾定下要在四十五歲前有一間自住樓和一間收租物業的目標，「已經超晒標啦，九七年開始學人做劏房收租，第一次做業主真係好緊張，開心到幾晚都瞓唔到，後來越買越多，慢慢就會麻木。」後來他搬入美孚新邨，○五年再搬到深井金麗苑千三呎海景單位，○九年後再斥資過千萬元，購得現時居住的複式海景單位。
「感激我隻乸」
廿多年前，吳伯恩會形容自己一無所有，初時入行賣魚因爛賭而輸很多錢，試過新年成副身家輸剩二萬元回廣州過年，就在遠洋賓館邂逅當服務員的老婆謝細妹，「我對佢一見鍾情，之後好主動約佢出街，拍拍吓就結埋婚。」結婚之後，吳伯恩並未改其爛賭性格，曾激得老婆抱着兒子回廣州。「當時好驚自己錢又冇，老婆又走佬先決心戒賭。」多年來，兩公婆一齊打天下，他看着老婆默默為他付出，雙手因長期浸水而變得粗糙，喉嚨亦因經常高聲叫賣而沙啞，有感負了她。「我隻乸出名做得，成條北河街都知！佢十四歲已經開始出嚟打工，好有毅力。嫁咗俾我，賺到錢又唔會亂使。有一次收完檔，老婆曾經喊住問我，咁辛苦究竟為咩？我一直記住。」說罷眼濕濕望着天，沉默下來。
他最新的目標是在五十五歲前，擁有至少三個鋪位，每個仔女各有一個。「之後我真係想退休，同老婆環遊世界。」
龍躉點食好？
一條三十至四十斤重的龍躉，售價達五千至六千元，由於身形龐大，通常斬件；而各個部位肉質及味道均不同，故有不同食法。
背翅：最鮮味
近翅的部位較嫩滑，在家可清蒸或蒜茸蒸，唯時間不可多於五分鐘。若想吃得繁複，可一片片煎來吃或以石鍋燜。（$11/兩）
龍躉魚身：啖啖肉
一般在家，簡單炒球即可；在酒家，可選擇堂煎或日式天婦羅，蘸沙律醬一同食用。（$11/兩）
龍躉骨：補鈣首選
即龍躉的尾龍骨，骨髓盡在其中，多用來煲湯，圖中一條街市價為二百元。（$7/兩）
龍躉下巴：識食必叫
因魚游泳時，下巴永遠向下，故又名「不見天」，此部位極嫩滑，可用燜、蒸的方法烹調。（$9/兩）
撥水翅：爽口之最
即龍躉撥水的部位，可生燜或清蒸，龍躉皮層有豐厚膠質，口感爽口。有婚宴菜單為清蒸撥水翅，蒸後好像展翅的鷹一樣，甚具氣勢。（$11/兩）
龍躉肝：數量最少
龍躉肝魚油豐富，健康的龍躉肝應為黃色。最好用椒鹽炒，但因數量罕有，不論在街市或酒樓，均要數天前預留。（$15/個）
龍躉扣：價錢最貴
即龍躉的胃，骨膠原豐富，可夾海參、鴨掌或新鮮花膠來燜，十分惹味。質量好的龍躉扣應為雪白色，若帶紅色，即含血量高就會帶腥。
（$250/斤）
一人一句論恩記
支持派
吳伯恩老婆謝細妹：「我一定支持佢！自從離開龍皇，佢一直想搞番飲食，佢今次咁盡力，我一定會落手落腳幫手，大力支持！」
前利苑行政總廚、現廣州興悅酒家董事長劉偉良：「鉅龍嘅燜龍躉背翅好鮮味，老虎斑球好爽又彈牙，全部係精品！香港冇第二間可以做到咁好味嘅龍躉，下次會成家一齊嚟食。」
老字號鳳城酒家董事總經理譚國景：「恩記老老實實，大情大性，所以同佢特別好傾。上兩個星期有十五圍師傅誕，恩記幫我搵咗七十斤老虎斑，計番條數，我覺得抵買呀！鉅龍專攻海鮮，有品質保證，食客一定回頭嘅。」
觀望派
皇上皇酒樓集團主席謝炳順：「鉅龍有自用鋪位，可免被加租逼遷。但夾股易出問題，見過酒樓生意好又拆夥，生意差就更快拆夥。有時拍檔係廚房佬，熱辣辣忙咗成日，眼見其他股東飲住紅酒、歎冷氣招呼客人，會覺得自己辛苦啲，扭計話分錢不勻。」
鳳城酒家飲食集團董事趙元新：「我唔識恩記，不過八千呎以上至叫做酒樓，佢哋三千呎只可叫做飯店仔！做酒樓好艱難，除咗捱貴租，最低工資立法後，我每間分店每月多三萬蚊成本。」
廣東燒味老闆李鈿：「中規中矩啦，會食多幾次，再試真啲！」
更多 壹週Plus 文章
