[孫柏文] 溫總叫買股又叫流選？ 2012年03月15日 人氣: 1448 回覆: 0

http://hk.apple.nextmedia.com/te ... 307&art_id=16157294

噚日凌晨，突然見到報道話 JP Morgan宣佈會回購股份。當時花旗國未收市，我第一個反應係：「遲啲唔係要公佈銀行壓力測試結果咩？如果 JP Morgan被評唔及格，要收番講過嘅嘢，咁咪好無面？」

...

... 不過睇 JP Morgan可以更推多步，即係就算唔夠資本，咁又點？你作為政府吹得佢脹咩？佢唔掂你就會托錢來救佢架啦！政府無錢？聯儲局都會印！

與政府角力銀行勝出

今次 JP Morgan嘅舉動，就係畀市場知，金融海嘯後政府同啲「大到不能不救」或「大到不能救」嘅銀行之間嘅權力同監管角力，銀行已贏晒。以前都仲可以有遐想按得住啲銀行，呢家就面對現實，有錢賺就益 Bankers、股東同借錢畀銀行做生意嘅債主，輸錢時就 Call納稅人、未來納稅人同辛苦儲錢嘅乖仔乖女，相關人士被抽稅之餘，手上現金購買力亦同時蒸發。

無恥？係。不過面對呢個潮流，如何應對？揸現金，唔得，甚至正版末日博士 Marc Faber話係最危險嘅事，因為輸硬。連創「黑天鵝」一詞嘅 Nassim Taleb，都話雖覺現今金融系統有隨時崩潰嘅可能，不過佢都被焗賭，買咗唔少股票。就係噚日，溫總開口令中港股市齊跌，應該係買貨好機會。

溫總話繼續打樓價，因遠遠未落返合理水平，不過又擔心經濟放慢，即係除樓市外，乜都會谷啦！

再講，前日我話希臘被裁定為走數後，之後禮拜一個股市發呆...

押重注唔會有金融危機

骨牌係咪擺好應一個跟住一個咁冧？係。不過歐央行放水放到好似將啲骨牌擺咗喺個裝滿水嘅魚缸底，你咪推冧希臘囉，睇吓有乜嘢跟住冧？我覺得去到呢點，應該押重注買唔會再有金融危機，令市場突然缺水令價格大冧特冧。個別資產價格走勢係咪會有分歧？係，即係我唔知應唔應該買香港樓，不過現金購買力只會不斷下跌，唔會再有 08年尾呢啲入市筍位。買，要快。

最後，噚日溫爺爺亦講起香港，仲搬咗小平同志出來。即係按本子辦事，流選時已有程序 Handle，為流選開綠燈，因京城已好亂，唔該港人治港，高度自治。

孫柏文
作者為獨立股評人
本欄逢周二、四刊出