系統主任
abbychau (亞貝)
rbenabled
avatar
127.0.0.1
金錢: 13753.95
帖數: 32022
GP: 5040
LV: 179
交易所: 13150616.50

[明報]【羅仕揚Blog】一個人的浪漫 人氣: 172 回覆: 0


「情人節同農曆新年喺埋同一個星期,最好嘅就係可以用濃烈嘅節日氣氛,沖淡咗一個人嘅寂寞。」可以想像,說這句說話的人,肯定是個單身的人。

 

有人說,由十二月到二月,是單身的人最難捱的幾個月份,只因由平安夜、聖誕節、除夕再到情人節,都是適合雙雙對對的日子。冬天天氣冷,一個人的床,難免欠缺溫度,誰人都想有個人依偎在身旁互相取暖。捱過了冬天,以為春天還會遠嗎?誠然,春節適合家人團聚,像今年的情人節是年廿九,或幾年前的情人節是初五,確實減低了一個人的孤獨感;但農曆新年一樣是單身人士的惡夢。「仲未拍拖呀?」「拖吓拖吓就三張幾啦!」「就算而家拍,拍兩三年結婚,生得仔嚟都差唔多四十,高齡產婦喇!」親戚們七嘴八舌地拿別人的事來討論,卻從沒徵詢過當事人的同意,想發作,但礙於家教或父母面子而未能發作的無奈,才是最難捱。

 

「個個都拍拖,唔通個個都想拍拖咩?」阿嬌充滿睿智的金句表面豁達,但她的無名指,不也剛被一隻戒指緊緊繫上?眾裡尋她,在這個男女比例失衡的年代,條件好的男士選擇眾多,但即使是條件好的女士,卻仍要面對激烈競爭。港女們經常被批評眼角高、腌尖腥悶,我實在想為她們平反一下。近幾年興起了一個叫「黃金盛女」的名詞,形容一些高身厚職、有條件享受高質素生活的單身女性。說實在,這些具獨立而強大經濟能力的單身貴族,想尋找與自己「同Lev」,包括收入與生活品味也「同Lev」的人作伴侶,難道不值得理解嗎?總沒理由要她婚後反而要「俾錢貼仔」吧!

 

大學師姐Samantha是上文所描述的黃金盛女之一,我們一般尊稱她為Sa姐。身為某外資零售銀行部門主管的她,工作繁忙是意料中事,但生活圈子狹窄才是「出事位」。「做銀行唔駛見客咩?無理由識唔到人架?」某次酒聚,某同學不怕得罪Sa姐,竟敢說出這句大逆不道的問題。「唔係識唔到,而係識到嘅,都唔會係對象。」想不到爽直的Sa姐不單沒有怪罪,還將她的心境娓娓道來。「以前做Junior,跑數見客一腳踢,其實係最易識到行家識到Client識到對象的時間,不過當時為工作搏到盡,就算有拍拖,最後都因為工作太忙,無時間好似其他情侶咁行街、食飯、睇戲維繫感情,拍親拖都有頭無尾。」銀行「跑數」壓力大,為工作而OT是等閒事,多少感情無疾而終,又有誰知都是工作惹的禍? 

 

「到後尾升咗職,工作可以交俾下面啲人做,有時間諗吓自己,先發覺社交圈子已變得越嚟越窄。」明明是一篇個人獨白,但Sa姐說起來平靜而有致,彷彿訴說著別人的故事似的。「人到三十,其實唔難發現,身邊有啲條件嘅男士,通常都俾人Mark晒,而未被Mark嘅,應該一世都唔會俾人Mark到,因為通常都係Playboy,又點會肯正正經經拍吓拖?」身邊聽過太多故事,說某些女生總相信自己能改變身邊的PlayBoy,覺得他會為她改掉花心的性格。「很傻很天真」的想法,通常換來悲劇收場,她最終只會成為他其中一段時間的某一件玩物,睿智的Sa姐當然不會去上這種當。

 

「頭先你話銀行好多Client,係,係成日見到唔同嘅人,但嗰啲都唔會係對象,而且你當咗佢係客,已經唔會諗呢啲情情塔塔嘢。」Sa拿起酒杯呷了一口,繼續說她的故事。「就算真係想諗,你諗吓銀行客有咩人,一係啲企業老闆,但講到明係老闆級,個個有車有樓有家庭,一睇已經知道唔會係對象,就算要搵,都搵後生女搞婚外情啦!」Sa姐有時實在太心水清,就是因為太理智,才和需要些少不理智的愛情失諸交臂吧!「第二類,近年越嚟越多嘅,係啲搞StartUp嘅老闆,即係報紙成日報嗰啲『毅然放棄投行百萬年薪』搞生意嘅後生仔,大部分都係富二代玩玩吓,如果唔係畀面老豆又或者有抵押,銀行點會肯借錢?」

「一個人,唔會空虛、寂寞同凍咩?」一矢中的,朋友見Sa姐打開心屝,問題一條比一條尖銳。「大部分時間唔會,有朋好似你咃咁,成日有局嘛!Cheers!」Sa姐拿起酒杯,大家當然踴躍敬酒。「一個人有一個人嘅好處,做咩都唔駛同人交代,食咩買咩住邊同去邊,反正份糧係自己。有時想買件禮物獎勵自己,又或者食餐好嘅,都唔需要諗太多。」一份糧一個人洗,抑或兩份糧一家人洗,Net Balance後應該人人也寧願選擇前者。「我見有啲結咗婚有埋仔女嘅朋友,見親都呻自己幾年無去過旅行,我呢?同公司請假,上網Book張機票,再執幾件衫入喼,想幾時行就幾時行,呢啲咪叫『一個人的浪漫』囉!」

「但情人節、聖誕呢?」席間朋友除了Sa姐外,其實也有其他單身女士,包括問問題的這位同學,但較年長的Sa姐一派智者姿態,所有問題才會集中在她身上。「You are not alone!其實朋友圈入面,一樣有好多單身,而且聖誕節咁多Party,你驚會悶?就算一個人喺屋企享受吓寧靜,一樣唔錯!情人節嘅感覺會差啲,好彩好多時都同農曆新年好近,咪靠節日氣氛沖淡吓。過得幾年,就會無咩感覺。」心態決定境界,Sa姐在這方面的拿捏確是世界級。「其實一個人,最緊要係錫自己,保持心境開放,唔需要刻意追求愛情,反正一個人都可以過得好開心;但如果愛情嚟,唔好封閉自己,話唔定有更多可能性呢?」

 

一個人的浪漫,要對自己好些,這是顯淺但重要的道理。祝大家情人節快樂,順祝大家有個愛自己的狗年。

 

羅仕揚
                    

來源: http://www.mpfinance.com/fin/col ... 9178&issue=20180214
訪客
Guest (IP: 54.81.183.183) avatar
(提示:如要觀看隱藏內容, 按此回到第一頁)
此版不容許訪客發貼, 請先登入。

Home RealBlog Stock Endless Choice Fancy Buzz Gloomy Sunday ZKIZ Wiki RealWidgets

geo stats
Powered by RealForum
Paged in 19.2ms (Q=6 + R=5) @ 2018-5-25 07:12 AM Asia/Hong_Kong
Archiver | 廣告聯繫: abbychau (at) gmail.com