系統主任
abbychau (亞貝)
rbenabled
avatar
127.0.0.1
金錢: 13756.95
帖數: 32023
GP: 5040
LV: 179
交易所: 13150616.50

[明報]【羅仕揚Blog】拜年就是不停的戰鬥 人氣: 299 回覆: 0


農曆新年,真的是個向親朋戚友表達祝福的節日嗎?對長輩來說,這是一個炫耀的機會,也是一個比拼的戰場。

時光倒流至20年前,那時才剛回歸不久。亞洲金融風暴過後,市面一片蕭條,即使是農曆新年,大家也不敢太鋪張,寧願留多些現金傍身。物質生活沒有比較的餘地,小孩子的學業成績,成為了家長僅有可以炫耀的東西。

「小明又考班入面頭三啦,呵呵呵!」新年團拜的場合上,姑姐這樣炫耀著自己的兒子。「不過我都鬧佢架,成日掛住玩,既然玩玩吓都有頭三名,就應該再勤力少少,拎埋個第一返嚟啦,呵呵呵!」其實在座的親戚都知道,表弟小明讀書絕非「玩玩吓」,在姑姐的地獄式監督下,每次考試也通宵達旦地苦讀,才能夠考獲佳績。當然,沒有人會踢穿姑媽的謊言,難道新年流流,就想上演初心赤口的大龍鳳?

「哎呀,小明考頭三咁叻仔呀!不過我哋敏敏仲叻,啱啱第一期試,考全班第一呀!連之前讀極都咁心散嘅杰仔,今次都考到第五名,由第十八名升上第五名喎!仲唔係最佳進步獎?」伯娘不讓姑姐專美,開始拿自己一對仔女的成績加入戰團。「敏敏過完年就考5級鋼琴啦!同埋杰仔,我以為佢咁百厭,讀書實無家姐咁好啦,點知俾老師話佢計數叻,揀咗入奧林匹克數學校隊,仲可以代表學校出賽!」那些年,奧數並沒有如現在般普及,確實需要得到老師的挑選,才有望獲得代表學校出賽的資格。「所以話,唔係剩係靠死讀書架,都要參加吓課外活動先得!」伯娘的眼光,此時偷瞄了已氣得滿臉通紅的姑姐一眼,明眼人也看得出,這句說話是說給姑姐聽的。

「講起課外活動,小明上年開始喺學校學單簧管,而家學學吓,都已經吹到成隻歌出嚟!」姑姐不是善男信女,當然不會如此輕易地被伯娘擊敗。「學管樂老師話齋,彈琴太普通啦,又唔係難學,又差唔多個個小朋友都識,突顯唔到同其他人有咩分別。」姑姐的這句話,目標明顯地是要將考琴的唐家姐敏敏比下去。「學琴好,玄門正宗,好過學其他旁門左道啦!」伯娘的反應也是頂級的快。「而且樂理基礎打得好,第日大個想學其他樂器,學咩都咁易上手,總好過未學行、先學走!」又是一句暗諷的反擊,連消帶打,表弟小明立時中招。

正常這兩個女人你一言我一語地戰鬥著,核心外圍坐在她們身旁的姑丈和伯父,面容上沒有流露出特別的表情,顯示出見慣大場面的定力;但眉宇之間,也滲透著幾分無奈。

時移勢易,孩子一天天地長大,霎眼之間,已一去二十載。依舊沒變的,是姑姐和伯娘在春節期間的比併第N回合。

「買樓好,而家啲樓價係咁升,早買早享受,而且有棟物業揸手,話唔定過多一兩年,又再升多三四成?」買樓,香港人千古難題「買樓」,伯娘說得如此眉飛色舞,自然是她找到新的炫耀點。「都係我哋杰仔本事,上年買咗樓,聽講個單位已經升左一成幾。有層樓係自己嘅,就算有咩衫長褲短,都可以有瓦遮頭;就算自己唔住租出去,每個月都有租收。」當年參與奧數比賽的唐大佬杰仔,最終沒有如伯娘所願進入大學,不過可能自幼聽母親的罵戰聽得多,猶如周星星跟老母學藝一樣,練就一條三寸不爛之舌,預科畢業後走了去當地產經紀,幹得風生水起,更在去年置了業。

「你話買樓一次過俾晒就話啫!如果要做按揭,咪又係要每個月供樓?」

說得如此霸氣是誰?自然是與伯娘針鋒相對的姑姐。買樓不用做按揭,多年來除了聽過陳奕迅老婆買2億獨立屋「一炮過」全數付款外,鮮有聽聞有人具備如此財力,姑姐這點實在有點「為拗而拗」。「計我話,買樓要孭幾百萬債上身, 順風順水就好嘅,一旦份工出現問題,真係自求多福喇!」說話說到如此盡,姑姐豈會沒有彈藥在手?「好似明仔做紀律部隊就最好,有公務員宿舍,乾手淨腳,就算將來冇得住,都每個人有房屋津貼。買樓又要交釐印俾政府,又要俾息銀行;做公務員每個月有政府『科水』,又唔駛蝕釐印蝕息,份工又穩陣,安安定定有得住,好過去買樓啦!」

「咁你又講得啱,其實住宿舍,咪同住公屋一樣,政府施捨,租金又平,其他開支又低,實好架!不過無本事嘅人,先要政府施捨啫,政府隨時加租又得、隨時收返又得,點講都係私樓有自己地方好。」正當伯娘暗諷著表弟明仔要靠政府施捨的同時,姑姐咀角微向上翹,應該想到了下一個攻擊目標。「杰仔買咗樓,同女朋友結婚生仔都得啦,阿敏呢?拍拖未呀?就算而家拍,拍得一兩年,到結婚都三十幾喇,要唔要我呢個做姑姐嘅,搵返一兩個『荀盤』俾呢個侄女?」又是拍拖結婚生仔問題,為了逃避質詢,唐家姐敏敏已好幾年沒有出席過這類新春團拜活動。「敏敏要揀,大把有得揀啦,不過佢做銀行咁忙,一來冇時間,二來自己又搵到錢,駛咩靠男人啫?」這是伯娘的死穴,明知拗下去必死,倒不如避重就輕、蒙混過去算了。

舌頭像利刃般攻擊著,口水如血漿般四濺。刀劍無眼,不變的是依舊在核心外圍的姑丈與伯父,繼續不為所動,只是略顯滄桑。拜年就是不停的戰鬥,只不知這兩個大男人,還要觀戰多幾多年?

羅仕揚
                    

來源: http://www.mpfinance.com/fin/col ... 2631&issue=20180222
訪客
Guest (IP: 54.164.198.240) avatar
(提示:如要觀看隱藏內容, 按此回到第一頁)
此版不容許訪客發貼, 請先登入。

Home RealBlog Stock Endless Choice Fancy Buzz Gloomy Sunday ZKIZ Wiki RealWidgets

geo stats
Powered by RealForum
Paged in 18.7ms (Q=6 + R=3) @ 2018-12-17 09:01 PM Asia/Hong_Kong
Archiver | 廣告聯繫: abbychau (at) gmail.com